ហេតុអ្វីអ្នកវិនិយោគសាធាណៈវិនិយោគលើទីផ្សារ​ មូលបត្រ?

 សម្រាប់ការវិនិយោគលើទីផ្សារមូលបត្រកម្មសិទ្ធិ

ការវិនិយោគជាការបណ្តាក់ទុនដើម្បីបង្កើនទុន ឬរំពឹងថានឹងទទួលបានប្រាក់ចំណេញ ឬប្រាក់ចំណូលពីការបណ្តាក់ទុនរបស់ខ្លួនមកវិញ។ ការវិនិយោគក្នុងន័យទីផ្សារមូលបត្រ សំដៅដល់ការទិញ-លក់មូលបត្រ។ ខ្ញុំបាទសូមលើកយកករណីនៃការវិនិយោគលើមូលបត្រ កម្មសិទ្ធិមកធ្វើការបង្ហាញតែប៉ុណ្ណោះ ព្រោះវាជាមូលបត្រដែលនឹងត្រូវបានគេទិញ-លក់ដំបូងនៅកម្ពុជានាពេលខាងមុខនៅលើទីផ្សារមូលបត្រដែលគ្រោងនឹងដាក់ដំណើរការ។ ការវិនិយោគលើមូលបត្រកម្មសិទ្ធិជាការ      វិនិយោគមួយ ដែលអាចផ្តល់ចំណេញ បានក្នុងកំរិតមួយខ្ពស់ជាងការវិនិយោគដ៍ទៃទៀត តែវាក៏មាន ហានិភ័យខ្ពស់ផងដែរ។

អត្ថប្រយោជន៍នៃការវិនិយោគលើមូលបត្រកម្មសិទ្ធិមានដូចជា៖

- អ្នកវិនិយោគសាធារណៈអាចទិញ-លក់មូលបត្របានភ្លាមៗ ព្រោះតែវា មាន សន្ទនីយភាពខ្ពស់ជាងឧបករណ៍ហិរញ្ញវត្ថុផ្សេងទៀត។

- អ្នកវិនិយោគសាធារណៈអាចទទួលបានភាគលាភ ដែលជាចំណែកនៃប្រាក់ ចំណេញ បានពីសកម្មភាពអាជីវកម្មរបស់ក្រុមហ៊ុនដែលបោះផ្សាយ។

-  អ្នកវិនិយោគសាធារណៈអាចទទួលបានចំណេញមូលធន ដែលបានពីការលក់ មូលបត្របានក្នុងតម្លៃខ្ពស់ជាងតម្លៃទិញរបស់ខ្លួនពីមុន (ចំណេញមូលធនក្នុងករណី វិនិយោគក្នុងទីផ្សារមូលបត្រកម្ពុជា)

-  អ្នកវិនិយោគសាធារណៈ ដែលវិនិយោគលើមូលបត្រកម្មសិទ្ធិ នឹងក្លាយជា ភាគហ៊ុនិកនៃ ក្រុមហ៊ុនបោះផ្សាយមូលបត្រ ហើយត្រូវបានគេផ្តល់សិទ្ធិ ក៏ដូចជាអត្ថប្រយោជន៍ផ្សេងៗនៅក្នុងសកម្មភាពអាជីវកម្មរបស់ក្រុមហ៊ុនផងដែរ។

ប៉ុន្តែការវិនិយោគលើមូលបត្រកម្មសិទ្ធិទាមទារឱ្យអ្នកវិនិយោគសាធារណៈ៖

-  មានការប្រុងប្រយ័ត្នខ្ពស់ ព្រោះថ្លៃរបស់មូលបត្រប្រែប្រួលរហ័ស ដែលអាចធ្វើឱ្យ អ្នកវិនិយោគសាធារណៈចំណេញ ឬខាតបង់ក្នុងទំហំធំភ្លាមៗ។

   ទោះយ៉ាងនេះក្តីប្រសិនបើអ្នកវិនិយោគសាធារណៈអាចគ្រប់គ្រង និងត្រួតពិនិត្យ ការវិនិយោគរបស់ខ្លួនជាប្រចាំ ជាពិសេសតាមដាន រាល់ព័ត៌មានដែលជា សញ្ញាណណាមួយជះឥទ្ធិពលដល់កម្រិតបម្រែបម្រួលថ្លៃនៃមូលបត្ររបស់គាត់ ពួកគាត់អាច មានលទ្ធភាពទទួលបានជោគជ័យច្រើនក្នុងការវិនិយោគលើទីផ្សារមូលបត្ររបស់ខ្លួន។

      អ្នកវិនិយោគសាធារណៈជាទូទៅគួរស្វែងយល់ពីមូលបត្រកម្មសិទ្ធិជាមុនសិន។ សម្រាប់ព័ត៌មាន និងវិធីសាស្រ្តលម្អិតក្នុងការវិនិយោគ ខ្ញុំបាទសូមលើក យកទៅបកស្រាយក្នុង Blog ក្រោយៗទៀត។