អ្វីទៅជាទីផ្សារមូលបត្រ?

អ្វីជាទីផ្សារមូលបត្រ? ជាបឋមគួរស្វែងយល់ពីពាក្យបច្ចេកទេសមួយចំនួនជាមុនសិន ដូចជា      ទីផ្សារ (Market) និងក្រុមហ៊ុនផ្សារ (Exchange) ទីផ្សារភាគហ៊ុន ឬទីផ្សារ​​ មូលបត្រ (Stock Market or Securities Market) និង ក្រុមហ៊ុនផ្សារភាគហ៊ុន ឬក្រុមហ៊ុនផ្សារមូលបត្រ (Stock Exchange or Securities Exchange)។ ទីផ្សារ គឺជាទីកន្លែងណាមួយ ឬយន្តការណាមួយដែលអ្នកលក់ និងអ្នកទិញអាចជួបគ្នា ដើម្បីដោះដូរនូវទំនិញ និងសេវាកម្មតាមតម្លៃព្រមព្រៀងគ្នាមួយជាក់លាក់។​ ចំណែកក្រុមហ៊ុនផ្សារជាទីកន្លែង ជាក់លាក់ ដែលផ្តល់យន្តការ ឬត្រូវបានគេរៀបចំ ឡើងសម្រាប់ ឱ្យ អ្នកលក់ និងអ្នកទិញជួបគ្នា ដើម្បីដោះដូរនូវទំនិញ និងសេវាកម្មតាម​ តម្លៃព្រមព្រៀងគ្នាមួយជាក់លាក់។ ដូចនេះ កាលណាគេនិយាយអំពីទីផ្សារមូលបត្រ គឺជាទីកន្លែងណាមួយ ដែលផ្តល់យន្តការសម្រាប់អ្នកលក់ និងអ្នកទិញឱ្យជួបគ្នា ដើម្បីដោះដូរនូវមូលបត្រតាមតម្លៃព្រមព្រៀងគ្នាមួយជាក់លាក់​។  ទីផ្សារមូលបត្រមានន័យ សំដៅលើវិស័យមូលបត្រនៅក្នុងប្រទេសនោះទាំងមូល។ ចំណែកកាលណាគេនិយាយពី ក្រុមហ៊ុនផ្សារមូលបត្រ គេសំដៅលើកន្លែងដែលផ្តល់យន្តការជាក់លាក់ ឬត្រូវបាន រៀបចំឡើងសម្រាប់ឱ្យអ្នកលក់ និងអ្នកទិញជួបគ្នា ដើម្បីដោះដូរនូវមូលបត្រ តាមតម្លៃព្រមព្រៀងគ្នាមួយជាក់លាក់។ ឧទាហរណ៍៖

-               ទីផ្សារមូលបត្រនៅសហរដ្ឋអាមេរិកៈ សហរដ្ឋអាមេរិកមានក្រុមហ៊ុនផ្សារ មូល- បត្រមួយចំនួន នៅក្នុង​​    ទីផ្សារមូលបត្ររបស់ខ្លួនដូចជា ក្រុមហ៊ុនផ្សារភាគហ៊ុន ញូយ៉ក (New York Stock Exchange or NYSE) ក្រុមហ៊ុនផ្សារភាគហ៊ុន អាមេរិក (American Stock Exchange or AMEX)។

- ទីផ្សារមូលបត្រនៅប្រទេសជប៉ុនៈ ជប៉ុនមានផ្សារមូលបត្រមួយចំនួននៅលើទីផ្សារ មូលបត្ររបស់ខ្លួនផងដែរដូចជា ក្រុមហ៊ុនផ្សារភាគហ៊ុនតូក្យូ (Tokyo Stock Exchange) ក្រុមហ៊ុនផ្សារភាគហ៊ុនណាកូយ៉ា (Nagoya Stock Exchange) និងក្រុមហ៊ុន​ផ្សារមូលបត្រអូសាកា (Osaka Securities Exchange)។

- ចំណែកទីផ្សារមូលបត្រនៅកម្ពុជា រាជរដ្ឋាភិបាលកម្ពុជាបាននឹងកំពុងរៀបចំ ហើយដោយ សហការជាមួយក្រុមហ៊ុនផ្សារកូរ៉េ (Korea Exchange or KRX) ដើម្បីបង្កើតទីផ្សារមូលបត្រដំបូងនៅកម្ពុជា គឺ ក្រុមហ៊ុនផ្សារមូលបត្រកម្ពុជា (Cambodia Securities Exchange or CSX )។