ដំណើរការនៃការទូទាត់ភាគលាភ

ការសំរេចចិត្តក្នុងការទូទាត់ភាគលាភ គឺត្រូវធ្វើឡើងដោយក្រុមប្រឹក្សា ភិបាលរបស់ក្រុមហ៊ុនបោះផ្សាយមូលបត្រ។ ក្រុមប្រឹក្សាភិបាលត្រូវប្រជុំពិភាក្សាគ្នាយ៉ាង ម៉ត់ចត់មុននឹងប្រកាសទូទាត់ភាគលាភទៅកាន់ភាគហ៊ុនិករបស់ខ្លួន ព្រោះនៅ ពេល ដែលភាគលាភត្រូវបានប្រកាស វានឹងក្លាយជាបំណុល របស់ក្រុមហ៊ុន ដែលក្រុមហ៊ុននឹងមិនអាចកែប្រែ ឬលុបចោលការទូទាត់នេះដោយងាយស្រួលនោះ​​ទេ។​ ក្រុមប្រឹក្សាភិបាលនឹងប្រកាសនូវពេលវេលា កាលបរិច្ឆេទផ្សេងៗ ដែលពាក់ព័ន្ធនឹងការទូទាត់   ភាគលាភ។ នៅពេលការទូទាត់ភាគលាភបានប្រកាស ដំណើរការនៃការទូទាត់ភាគលាភនឹងត្រូវបានធ្វើទៅតាមដំណាក់ និងតាម កាលបរិច្ឆេទដែលបានកំណត់យ៉ាងជាក់លាក់។​ ខាងក្រោមនេះជានីតិវិធីក្នុងដំណើរការនៃការទូទាត់ភាគលាភ៖

-               កាលបរិច្ឆេទប្រកាស ជាកាលបរិច្ឆេទ ដែលក្រុមប្រឹក្សាភិបាលសំរេច និងប្រកាសពីការទូទាត់ ភាគលាភ។ នៅក្នុងការប្រកាស នេះ កាលបរិច្ឆេទប្រកាសបញ្ជីឈ្មោះ​ភាគហ៊ុនិកដែលត្រូវទទួល បាន ភាគលាភ ឬសិទ្ធិនិងកាលបរិច្ឆេទទូទាត់នឹងត្រូវបាន ប្រកាស ឱ្យដឹង។ ឧទាហរណ៍ នៅថ្ងៃទី ១ ខែ មករា ក្រុមប្រឹក្សាភិបាលបានប្រកាស ថា នឹង          ទូ​ទាត់ភាគលាភ ២០០០ រៀល ក្នុង ១ មូលបត្រ នៅថ្ងែទី ១ ខែ កុម្ភៈ ទៅឱ្យភាគហ៊ុនិក        ទាំងអស់ ដែលមានក្នុងបញ្ជីឈ្មោះ​ភាគហ៊ុនិកដែលត្រូវទទួល បានភាគលាភ ឬសិទ្ធិនៅថ្ងៃទី​ ១៥ ខែ មករា។

-               កាលបរិច្ឆេទអ៊ិចឌីវីដឹនដ៍ ជាកាលបរិចេ្ឆទដែលសម្រាប់កំណត់ អត្តសញ្ញាណភាគហ៊ុនិក ដែលនឹងត្រូវបានកត់ត្រាទុកនៅក្នុងកាល បរិច្ឆេទប្រកាសបញ្ជីឈ្មោះ​ភាគហ៊ុនិកដែលត្រូវទទួល បានភាគលាភ ឬសិទ្ធិនូវសិទ្ធិពេញលេញជាផ្លូវការ ដើម្បីប្រាកដថា ភាគលាភ នឹងត្រូវបានទូទាត់ឱ្យខ្លួន ទោះបីភាគហ៊ុនិកលក់ មូលបត្រកម្មសិទ្ធិ របស់ខ្លួនហើយក៏ដោយ តែការលក់របស់ពួកគាត់ ត្រូវបញ្ជាក់ថា ពួកគាត់មានមូលបត្រកម្មសិទ្ធិមុន កាលបរិច្ឆេទអ៊ិចឌីវីដឹនដ៍ ហើយគាត់ លក់ក្រោយកាលបរិច្ឆេទអ៊ិចឌីវីដឹនដ៍។ ក្នុងរូបភាពអ្នកទិញ ប្រសិនបើ គាត់ទិញមូលបត្រកម្មសិទ្ធិមុនកាលបរិច្ឆេទអ៊ិចឌីវីដឹនដ៍ នោះគាត់នឹង មានសិទ្ធិទទួលបានភាគលាភពីក្រុមហ៊ុន  ប្រសិនបើគាត់មិនលក់វាវិញមុន កាលបរិច្ឆេទអ៊ិចឌីវីដឹនដ៍ដដែល។ ប៉ុន្តែប្រសិនបើគាត់ទិញមូលបត្រកម្មសិទ្ធិ ក្រោយកាលបរិច្ឆេទអ៊ិចឌីវីដឹនដ៍ នោះ គាត់គ្មានសិទ្ធិទទួលបាន ភាគលាភពីក្រុមហ៊ុនទេ។ កាលបរិច្ឆេទអ៊ិចឌីវីដឹនដ៍នេះ បង្កើតឡើងដោយប្រតិបត្តិករទីផ្សារ មូលបត្រ ដោយមានរយៈពេល ១ ថ្ងៃនៃថ្ងៃធ្វើការមុនកាល បរិច្ឆេទប្រកាសបញ្ជីឈ្មោះ​ភាគហ៊ុនិកដែលត្រូវទទួល បានភាគលាភ ឬសិទ្ធិ។ តាមការប្រកាសខាងលើ ថ្ងៃទី ១៤ ខែ មករា គឺជាកាលបរិច្ឆេទអ៊ិចឌីវីដឹនដ៍។ សរុបសេចក្តីមក នៅចន្លោះកាលបរិច្ឆេទប្រកាស និងកាលបរិច្ឆេទអ៊ិចឌីវីដឹនដ៍ មូលបត្រ    កម្មសិទ្ធិនឹងត្រូវបានធ្វើការជួញដូរដោយមានភាគលាភ ដូចនេះថ្លៃរបស់ មូលបត្រកម្មសិទ្ធិកើនឡើងឆ្លើយតបនឹងទំហំភាគលាភដែលនឹងត្រូវទូទាត់។ ចំណែកឯនៅកាលបរិច្ឆេទ         អ៊ិចឌីវីដឹនដ៍ ជាថ្ងៃចាប់ផ្តើមទីមួយ ដែលមូលបត្រកម្មសិទ្ធិនឹងត្រូវបានជួញដូរដោយគ្មានភាគលាភនៅលើទីផ្សារម្តងទៀត ជាហេតុធ្វើឱ្យថ្លៃរបស់មូលបត្រកម្មសិទ្ធិធ្លាក់ចុះ ឆ្លើយតបនឹងទំហំរបស់ភាគលាភ ដែលនឹងត្រូវទូទាត់ផងដែរ។

- កាលបរិច្ឆេទប្រកាសបញ្ជីឈ្មោះ​ភាគហ៊ុនិកដែលត្រូវទទួល បានភាគលាភ ឬសិទ្ធិ ជាកាលបរិច្ឆេទ ដែលក្រុមហ៊ុនរៀបចំឈ្មោះ ភាគហ៊ុនិករបស់ខ្លួន គឺ ភាគហ៊ុនិកដែលមាន មូលបត្រ កម្មសិទ្ធិនៅកាលបរិច្ឆេទអ៊ិចឌីវីដឹនដ៍ ដែលមានសិទ្ធិជាផ្លូវការពេញលេញ ក្នុងការទទួលបានការទូទាត់ភាគលាភដល់ខ្លួន។ អ្នកដែលមាន ឈ្មោះក្នុងបញ្ជីឈ្មោះ​ភាគហ៊ុនិកដែលត្រូវទទួលបានភាគលាភ ឬសិទ្ធិ នឹងត្រូវបានក្រុមហ៊ុនទូទាត់ភាគលាភឱ្យនៅកាលបរិច្ឆេទូទាត់។ តាមការ ប្រកាសកាលបរិច្ឆេទប្រកាសបញ្ជីឈ្មោះ​ភាគហ៊ុនិក ដែលត្រូវទទួលបាន ភាគលាភ ឬសិទ្ធិ គឺ ធ្វើនៅថ្ងៃទី ១៥ ខែ មករា។

-               កាលបរិច្ឆេទទូទាត់ ជាកាលបរិច្ឆេទ ដែលភាគលាភនឹងត្រូវទូទាត់ ទៅឱ្យភាគហ៊ុនិក ដែលមានឈ្មោះក្នុងបញ្ជីឈ្មោះ​ភាគហ៊ុនិក ដែលត្រូវទទួលបានភាគលាភ ឬសិទ្ធិ ដែលធ្វើឡើងក្នុងកាល បរិច្ឆេទប្រកាសបញ្ជីឈ្មោះ​ភាគហ៊ុនិកដែលត្រូវទទួលបានភាគលាភ ឬសិទ្ធិ ដែលមានសិទ្ធិពេញលេញក្នុងការទទួលបានការទូទាត់ភាគលាភ។ តាមការប្រកាសខាងលើកាលបរិច្ឆេទទូទាត់ គឺនៅថ្ងៃទី ១ ខែ កុម្ភៈ។

                ភ្នាក់ងារទូទាត់

ភ្នាក់ងារទូទាត់ សំដៅដល់បុគ្គលដែលទទួលបានការទទួលស្គាល់ ឱ្យផ្តល់សេវាក្នុងនាម        ក្រុមហ៊ុនបោះផ្សាយមូលបត្រទៅលើការទូទាត់ភាគលាភ ការប្រាក់ ប្រាក់ដើមឬការទូទាត់ផ្សេងៗទៀតដែលត្រូវផ្តល់ឱ្យម្ចាស់មូលបត្រ កម្មសិទ្ធិដែលពាក់ព័ន្ឌ ទៅតាមការណែនាំរបស់ក្រុមហ៊ុនបោះផ្សាយមូលបត្រ។ អ្នកវិនិយោគសាធារណៈដែលទទួលបានការទូទាត់ភាគលាភអាចបើកប្រាក់ពីភ្នាក់ងារទូទាត់នេះ។ សម្រាប់ការទូទាត់ភាគលាភជាសាច់ប្រាក់ ភ្នាក់ងារទូទាត់អាច ទូទាត់ភាគលាភជារូបិយវត្ថុ ដែលជាធម្មតាទូទាត់តាមរយៈប្រព័ន្ធបញ្ជូនមូលនិធិ អេឡិចត្រូនិច ឬជាមូលប្បទានបត្រ។